- peacefulhomehk
- Apr 4
- 3 min read
港幣 20000元已經達標
真心多謝各位善長
如果截數後仍然有捐款
善款會繼續撥落呢個個案裡面
因為眾籌到呢兩萬蚊之後
服務費用仍有大約一萬蚊內 由晴善舍資助
不過現在正式截數
小編代表這個家庭
衷心感謝各位善長
祝願 各位善長 身體健康 一切順利
眾籌求助個案！！！
希望大家可以幫手
我哋好耐冇做過 #眾籌 了
喺呢九年裡面 晴善舍都幫助了不少求助家庭
提供免費嘅殯儀服務
通常我哋免費幫助嘅個案 都係以院出為主
因為始終成本比較低
而其實我哋亦會資助求助家庭完成殯儀館嘅喪禮服務
今次求助人 其實喺晴善舍成立初期
我哋已經幫過佢一次
當時呢位客人嘅女兒過身 女兒只得20幾歲
女兒患咗一個好奇怪病好多年 長期住醫院
而客人當時亦都自己打兩份工
所以當時我哋決定資助呢個家庭做殯儀館服務
當時亦都有眾籌過
而今次呢位客人再次搵小編
今次係佢媽媽過身
小編再次問到客人嘅家庭背景
得知客人其實有幾兄弟姊妹
但係好不幸 佢哋咁多位兄弟姊妹
每位嘅經濟情況 都係比較較差…
有需要醫病嘅 已經問咗人哋借錢
亦有俾人呃晒啲錢（包括我呢位客人）
亦都有沒有積蓄嘅 亦有已欠債嘅
而佢哋住緊間公屋其實係媽媽名
所以過咗一段時間之後 就會收返間屋
佢哋有幾個會冇屋住…
本來其他家庭成員搵咗其他殯儀公司
但係其他公司開嘅價錢
亦都比小編本來嘅收費貴好多
所以成件事就好似踢波咁
最後都踢返俾我呢個客人處理
而幾位出唔到錢嘅兄弟 亦都要求我呢位客「比住先」
我呢位客人 咁多年都係打兩份工
但又咁啱上年年尾整親隻手
而家做緊物理治療 亦都再做唔到廚房裡面既工作
小編一路聽客人講佢屋企嘅背景
聽到兩隻手托住個頭 「唉」咗好幾聲…
我問客人 你哋屋企究竟發生咗咩事…
客人話 喺女兒過咗身之後 佢都係打兩份工
平時冇乜消費 所以其實都儲到舊錢
如果前兩年佢同另外一位家人唔係俾人呃晒啲錢
今次媽媽走咗 就唔會咁麻煩…
客人話今次係麻煩到小編 因為佢知道屋企雖然咁多人
但係都真係冇邊個有能力可以負擔到個喪禮
而佢哋真係好想用殯儀館同打一場齋俾媽媽
所以希望小編可以幫到佢
因為全部嘅責任都落晒喺佢身上
（但係明明有幾兄弟姊妹）
最後小編同客人講
呢個個案我可以資助佢
客人同幾位家人盡量會俾到一部份嘅費用嘅
而另外嘅部份 就由小編眾籌
今次小編希望能夠眾籌港幣20000元
而應該仲有幾千蚊嘅費用
就會由晴善舍基金支出
小編真心希望大家可以幫到我呢位客人
晴善舍戶口：
BEA 東亞銀行
200 68001027 saving account
Peaceful Home Ltd
可註明： 眾籌個案
請將入數紙 或捐款紀錄
PM 本專頁Messenger
或者WhatsApp 96830483
捐款港幣$100以上 可有收據
眾籌費用一經達標 小編亦會通知大家
萬分感謝各位
