20260211 兩位小天使

連續兩日於同一間醫院完成了兩位小天使的個案

分別係39週 大約32週

第一個個案係來自一個外國嘅家庭

媽媽十分傷心 相信因為小天使已經是39週

父母原本計劃只是兩人簡單悼念小天使

冇諗過最後來自世界各地的親友都來到香港

當日大約有50位親友來到醫院的告別禮堂

陪伴父母 送別小天使

而昨天的個案 同樣有親友來到醫院

相信係爺爺嫲嫲同公公婆婆

雖然要告別小天使 係好不捨

但係相對呢個家庭每位成員嘅心情係比較輕鬆

感覺係想話俾小天使知 雖然大家都好唔捨得你

但係都希望你可以放心去到另外一個國度

繼續做一個開心嘅Baby

喺做過咁多個小天使嘅個案裡面

大部份都只有父母出席喪禮

原因大概係唔想麻煩到親友

或者唔想令到長輩更加傷心

甚至唔係每一位都想睇到小天使嘅遺體

呢個小編當然明白

所以當小編見到有個案

係有親友嚟到送別小天使

小編會好安慰

因為可以話到俾小天使知

其實你並不孤單 屋企人係好唔捨得你

同埋永遠都係愛你既

喺呢兩日

小編最深刻嘅就係第一個個案

爸爸喺火葬場講嘅第一句說話

“ I didn’t have a chance to play with you”

聽到呢句說話 小編個心抽一抽住

大家要知道 爸爸同媽媽係唔同嘅

喺胎兒成長嘅期間 爸爸係感受唔到既

所以當小編聽到爸爸咁樣講

完全感受到佢嘅痛心同遺憾

近排晴善舍多咗好多關於胎兒殯儀嘅查詢

嚟緊對於 #胎兒殯儀 亦都會有一個新project

都係 #不收費 既

小編越做得多胎兒嘅個案 就越想幫佢哋

希望佢哋每一位都可以有尊嚴地

有屋企人陪住 完成埋佢地喺呢個世上最後既一刻

雖然係要一個好大嘅勇氣

但係都希望父母喺過程裡面可以參與多少少

唔好令自己有遺憾 可以好好送別小天使