2026年4月23日 摺紙鶴義工

急不及待想同大家分享

剛剛在歌連臣角完成過案就約一位義工交收

呢度有209隻紙鶴

每一隻都係由呢位義工摺既

而呢位義工 亦都係之前接咗好蓮花俾我哋嗰位

今朝嘅喪禮 因為在公眾殮房做院出喪禮服務

家人亦沒有通知其他親友

只係用簡單上香儀式

所以小編亦都帶咗呢位義工摺既蓮花

送上一份祝福同功德比先人

希望先人離苦得樂

2026年4月22日 24週以下胎兒紙盒

小編2026年新改良版本

#24週以下胎兒 #棺木 （#紙盒）

今年好想推廣 #胎兒殯儀

亦都想喺呢個範疇再做多啲幫 #小天使 

除咗之前招募摺紙星星同紙鶴嘅義工之外

小編一直都喺度諗仲有啲乜嘢可以再做得好

其實小編由細到大都冇乜特別長處或者興趣

但係對於家居佈置方面 小編對自己都有啲信心

就諗不如喺小天使盒仔佈置方面可以再努力啲

俾小天使一張好cozy嘅床仔

所以就入手左一啲靚靚嘅布 喱士 同花邊

同埋再有義工車咗啲靚靚枕頭仔俾我哋

希望小天使 有尊嚴地 去第二個國度

繼續做一個開心嘅Baby

2026年4月13日 遺體化妝師 趣事

今日想同大家分享吓小編做遺體化妝師唯一一件趣事

當年嘅有一日

小編喺福澤殯儀館跟妝

 （即係今日嘅寰宇殯儀館）

跟妝嘅意思化妝師其實喺較早之前已經為先人化好妝

到大約四點幾嘅時候當家屬到咗殯儀館

化妝師再會再去靈堂

同家屬一齊睇一睇個妝

堂倌先生好多時候都會問家屬是否需要「加紅減淡」

即係問家屬個妝容是否OK？

可能以前有好多報道關於遺體化妝

覺得遺體化妝個妝就一定係古靈精怪

以前年代 串人哋個妝好核突

就係話化到死人化妝咁

其實而家大家唔使擔心

第一 而家大部份嘅遺體化妝師年紀都比較後生

佢哋嘅審美觀 相對都係OK

第二 其實而家大家化妝嘅方向都係以自然為主

所以大家唔需要好擔心化妝師嘅出品

而家仲有客人同小編講話驚啲化妝師用雙頭筆畫眉

一聽到咁講 小編都知道呢啲客人係睇過邊啲報道

但係小編想話 嗰篇報道係講緊70年代啲化妝喎

而家你想用雙頭筆畫先人條眉

小編都唔制啦 咪影響晴善舍嘅聲譽

好喇 講返正題… （係！仲未講正題嘅）

咁嗰日就係去到福澤殯儀館跟妝啦

唔記得咗乜嘢原因

可能係想再畫下條眉定係加多少少唇膏

總之輕輕加番少少嘢就OK 㗎喇

家屬都唔使再睇

咁所有家屬出晒嚟之後 小編先做嘢

點知迅雷不及掩耳之際

個堂倌竟然鎖埋個門閘

即係小編困咗喺裡面

要解釋一下 而家既寰宇殯儀館

如果大家有去過 就會知道靈寢室有幾度趟門嘅

上半部係玻璃嘅 咁大家就可以喺出邊睇到先人嘅容貌

以前福澤殯儀館嘅年代 呢度門

係有個勾仔 鎖住道門嘅

不過而家寰宇殯儀館就冇咗呢個勾架喇

小編喺靈寢室裡面對住道門

親眼望住呢個堂倌鎖咗自己係裡面 跟住佢好快就走咗…

但係小編當時冇即刻拍門

第一 反正小編都要執埋個妝

就算拍門都係要繼續做嘢㗎啦

第二 小編望到嘅位置係一個人都冇嘅

如果就咁大力拍門 其實會嚇親出邊嘅人

啲人驚得滯走晒仲大件事

小編當時諗 反正儀式都未做 一定會有人再嚟睇先人

或者行近靈寢室位置

所以小編當時就選擇做埋啲嘢先

執埋個化妝箱 跟住就睇吓有冇人行近靈寢室

其實都係等咗一陣 見到有個人 小編仲驚嚇親佢喎

好尷尬地揮揮手 叫佢嚟救小編

呢位家屬初時都話有啲嚇親

不過小編已經以盡量唔驚嚇嘅方式嚟求救

最終就安全同尷尬咁出返嚟

呢個堂倌小編今日都認得佢係邊

大家唔好誤會 小編同呢個人應該係冇過節嘅

佢係咪想玩小編 真係唔知

不過有時可能大家做嘢都好順手

佢見出咗靈寢室 咪順便閂門囉

都有可能係咁嘅

反正又唔會嚇到小編既

以上就係小編當年做遺體化妝師唯一既搞笑事