2026年3月23日 遺體化妝師

今日想同大家分享小編做遺體化妝師嘅經歷

喺2016年初 未有計劃開晴善舍嘅時候

小編曾經做過幾個月的遺體化妝師

小編好感恩 能夠成為過遺體化妝師

因為呢個經歷實在係太難得

其實 一般遺體化妝師係唔會亂咁收徒弟既

但係嗰陣時又好好彩

經過一位舊舖既同事介紹

就有位師傅收咗小編做徒弟

呢位師傅 都係幫舊舖做遺體化妝嘅

所以小編以前都接觸過呢位師傅

記得小編第一日「返工」

師傅就約咗小編喺殯儀館樓下等

跟住師傅就帶咗小編上咗靈堂

去睇當日佢哋嘅工作

記得第一日好似係跟住師姐去工作

師姐就教為遺體化妝嘅步驟

例如清潔好面部 執型 跟住就化妝 梳頭

最後亦都要整返好先人着嘅衫

鋪好個圍床 整好頭花檯花

之後小編就好記得師傅有問過師姐

小編嘅反應係點

咁當然當時小編對遺體 都冇乜特別嘅反應

所以就好順利 第二日繼續返工

其實小編對遺體冇反應係因為

之前已經喺殯儀公司做過了

所以對於殯儀館 靈堂 遺體 都係唔驚嘅

好多人都有個迷思 或者係都市傳說

究竟入行做殯儀或者遺體化妝師

係咪會俾人困住 同啲遺體一齊一晚

冇嚇死 先可以入行

其他人就唔知喇

但係小編第一次入殯儀公司嘅時候

係冇俾人困住過嘅

而做遺體化妝

小編喺頭幾日返工嘅時候

師傅係有叫過小編 喺殯儀館嘅殮房裡面做野

當時裡面大約有五六個遺體

係小編自己一個人嘅

但係小編又認為當時師傅唔係特登要困住小編喺殮房

而係真係要小編做嘢

所以呢啲都市傳說 都係得啖笑

關於遺體化妝嘅故事實在太多了

之後嘅星期一 有機會又同大家分享吓吧