2026年3月18日 小天使計劃

  小 天 使 計 畫

今朝小編去咗照腸胃鏡 係要麻醉嘅

本身諗住做完之後都應該會訓一段時間

點知喺半夢半醒嘅時候

突然間諗起今日好想出一個post

小編就醒晒了

今日想同大家分享 今年晴善舍第二個project

「小天使計劃」

#小天使 #失胎殯儀 喺香港唔算係一個好大嘅需求

而老實講

亦都唔係咁多殯儀行家想做呢一類嘅個案

喺上個禮拜 My Coffee Break podcast節目裡面

小編講咗好多

點解個案數目仍然偏少 當然原因有好多

其中原因可能唔同家庭成員都有意見

覺得小Baby都走咗 咁就由醫院處理吧

或者可能坊間有一啲公司

對於小天使個案 費用都近似成人嘅個案

所以好多家庭亦寧願俾醫院處理

喺節目裡面小編都有提到

點解小編將服務價錢一減再減

由近乎成本 再將嬰兒棺木的價錢由晴善舍捐出

就係因為希望更多父母 唔使因為價錢嘅問題

可以陪埋小Baby最後一程

為咗可以幫到更多父母

小編今年再有新服務比到小天使

凡係 #24週以下胎兒 如果想安排安葬的話

可以選擇土葬及火葬

但係小編之前都提過

24週以下嘅胎兒的棺木係一個 #紙盒 嚟嘅

而唔同嘅機構 需要嘅紙盒嘅尺寸都唔同

好多時候父母一同小編聯絡

小編都會問而家小天使喺邊間醫院

因為唔同醫院處理嘅手法係唔同嘅

有啲醫院嘅服務係好好

佢哋嘅姑娘亦都會幫手放好小天使喺個盒裡面

所以小編都會同父母講 如果係呢間醫院嘅話

其實絕對唔需要用我哋嘅服務

少少費用都可以慳埋

但係紙盒 就係一個好傷腦筋嘅問題

喺坊間事實上真係好難搵到啱尺寸嘅紙盒

有嘅 都係一啲禮物盒

所以過往都有一啲家庭

雖然冇用我哋晴善舍嘅服務

但係小編都會免費提供紙盒比佢哋

所以今年 小編決定就算唔需要我哋嘅服務都好

晴善舍都會 #免費提供紙盒 比有需要嘅家庭

而紙盒裡面 小編可以教父母點樣鋪好一張床仔

或者小編幫手鋪好

又或者如果父母有時間嘅話

可以上嚟晴善舍工作室 一齊做呢個紙盒

而今年小編亦都好好彩

遇到懂得縫紉嘅義工

可以幫手車一啲小Baby嘅枕頭仔 或者係床墊

十分感恩

雖然晴善舍係一個好小型嘅機構

但係小編都有個願望 希望可以推廣到 #胎兒殯儀

令到多啲小天使可以有爸爸媽媽陪住走最後嘅一程

之後再為大家介紹

不同關於 #小天使安葬 既機構同資料