2026年1月5日 兒童生死教育

之前的大埔火災

應該係一個時刻

父母可以同小朋友講關於死亡既議題

小編女兒今年四歲

雖然小編成日都同長者講生死教育

但係對於年幼嘅小朋友

要搵一個適合嘅切入點講死亡 並唔容易

小編做咗父母之後

覺得第一個可以同小朋友講關於死亡嘅題材

應該係白雪公主

坦白講 喺女兒仲係兩歲至三歲嘅時候

講白雪公主食咗毒蘋果之後

都係講佢係暈咗

因為對於一個咁細嘅小朋友

「死亡」確實係好難解釋

但係隨着小朋友漸漸長大

就冇辦法唔同佢提及「死亡」呢個話題

小編女兒雖然四歲

但係佢已經去過三次喪禮

因為呢三次都係好親嘅親人去世

而小編亦覺得其實小朋友去喪禮冇問題

所以就帶同女兒出席

但當然去喪禮嘅時候 女兒未必好明白發生乜嘢事

而真正有機會同女兒去講解乜嘢叫做「死亡」

就應該上兩個月 女兒的爺爺遷灰嗰一日

女兒的爺爺本身是在另外一個地方安位

而當時因為女兒真係太細個 同埋路程太遠

所以一直家人都唔想女兒去拜祭

近排我哋再次抽中其他地區

而今次小編覺得女兒應該要出席了

當日我哋安排咗喃嘸師傅做道教儀式

小編好surprise 當我哋做儀式嘅時候

女兒竟然可以好乖咁企喺小編隔離

一齊去做儀式

當然喺整個過程女兒都有問好多問題

所以當日小編就正式解釋

「死亡」係一件乜嘢事

跟住到宏福苑事件 小編同先生都決定帶女兒去獻花

我哋都有同佢解釋 喺呢個意外有好多人過咗身

我哋需要用一個咩態度同心情去面對呢件事

生命係有開始 亦都有結束

對於一個四歲嘅小朋友 而家當然未可以完全明白

但係作為父母 始終有一日

都要同小朋友去探究呢個議題

點樣講為之正確 係冇絕對嘅答案

但係小編認為必須用一個正面嘅態度

去同小朋友分享

同時間可以教佢哋珍惜身邊嘅人 事 同物

呢個就係我哋作為父母要俾孩子嘅生死教育