2025年9月18日 胎兒殯儀

曾經有一位行家同小編提過

當做24週以下小天使個案嘅時候

有啲父母買嘅紙盒 有埋啲包裝絲帶蝴蝶

個感覺好奇怪

明明係小天使既喪禮 就用個禮物盒裝住

覺得唔係咁好…

今日小編用咗成日時間在工作室做大掃除

搵到呢個紙盒

呢個紙盒係好早期 小編做24週以下個案嘅時候買嘅

當然係冇用過啦 因為買完之後 小編都覺得唔用得

所以一直擺咗喺工作室

當時小編聽到呢位行家咁講

小編冇即時同呢位行家解釋

其實適合唔同地方安葬嘅紙盒

喺香港市面係好難買到

又要唔可以太花巧

又要實淨 又要啱size

其實係一般出邊書局任何地方都好難買到

小編都係喺淘寶買 仲要都唔係容易搵

唔係間間都有適合嘅size

而有時真係見到父母用禮盒裝嘅紙盒

小編深信其實佢哋都唔想

只係真係冇渠道可以買到一個更加適合嘅紙盒

佢哋先唯有用禮盒包裝嘅盒

失去咗小朋友已經係好傷心

仲要為一個紙盒去奔波 搵咗好耐都買唔到

呢種心情 唔係個個能夠體會到

所以如果你哋有機會見到有父母用禮盒裝嘅紙盒

為小天使安葬嘅話

千祈唔好對父母有任何嘅意見

因為佢哋可能就算搵一個禮盒裝嘅盒

都唔係容易