2025年9月14日 小編分享

小編成日都同大家分享「死亡」

今日就想同大家分享「生命」

其實天地萬物 生命力係好強大

話說小編因為女兒幼稚園活動關係

愛上咗種盆栽（盆景）

由一盤 變咗而家六七盤係工作室

其中一盤盆景 本身係種咗一棵好細嘅草

另外其他位置就擺咗啲苔蘚

苔蘚係乜嘢 唔喺度詳談

不過苔蘚有個好特別嘅地方

就係當你種種下嘅時候

佢出其不意會生其他唔同嘅草仔出嚟

同一塊苔蘚 可能會長出幾種嘅植物

圖中嗰條長得好長嘅 藤（唔知點樣形容）

本身佢只係一條長長哋嘅葉

越嚟越長 長到長過晒個盒

跟住底部已經係乾咗又冇葉

淨係上邊嘅部份有啲葉

加上因為工作室太熱 

小編見到成條嘢都乾晒 都諗住剪走咗佢

點知上個月頂部竟然開咗啲黃色小花

本身一粒 跟住喺嗰一粒裡面就生多咗幾粒花仔

今日返到工作室

側邊竟然再開多一朵小花冧

明明下邊啲根部同啲葉都乾得七七八八

竟然啲花可以開完再開

真係生命力之強大