2025年12月9日 小編分享

近呢個禮拜

大家都喺度講 應唔應該去玩或者慶祝聖誕節

小編喺呢兩個禮拜 對於post啲乜嘢題目

其實都有少少避忌

覺得反正大家在社交媒體已經有好多關於

宏福苑的新聞

小編就唔想再post太多了

但係做其他主題 時間上又有啲尷尬

所以其實呢十日八日 寧願靜落嚟

俾自己消化下一啲好唔開心嘅情緒

到咗有學生被取消聖誕聯歡會 改正常上課

社會又有啲迴響

甚至有新聞講到 就算係宏福苑嘅居民

都覺得市民應該有適量嘅慶祝

而喺呢兩個禮拜小編見到最正面嘅採訪

就係有一位黃小姐 過身孖女其中一人就係佢弟婦

佢哋一家人有幾個單位都係喺宏福苑

面對失去家人嘅傷痛

雖然喺畫面都見到黃小姐應該係喊到對眼都紅晒

但係佢亦都可以好正面咁回答記者嘅問題

真係好難得（雖然亦戥佢心痛）

上星期

小編女兒跟學校去鄰舍中心探訪老人家

喺呢個時候 我哋可能仲帶住悲痛嘅心情

但係 好現實 生活仍然要繼續

嗰日見到老人家 睇住一班幼稚園嘅小朋友唱歌仔

個個老人家都好開心 笑到見牙唔見眼

小編希望 雖然而家係一個氣氛沉重嘅時間

但係都希望大家有一個愉快嘅心情

繼續好好咁生活