2023年9月19日

上個週末，晴善舍完成了一個東平洲土葬個案。

大家都知道，由10號風球嗰日開始，天氣一直都唔好，而小編每一日由屋企出嚟做嘢都戰戰兢兢，要提早好多個鐘頭出門口。

到左15號設靈當晚，又突然間紅雨，小編真係灰過灰燼… 又唔知返唔返屋企好，第二朝又要7:30前到殯儀館… 總之就係乜嘢都好擔心 好好彩最後嘅雨勢都唔算好嚴重，第二朝都係間歇性微雨！

16號朝早，小編就好早到咗殯儀館，除咗要準備出殯嘅事情之外，就係要食好個早餐，準備到東平洲落葬。因為一程嘅船程都要1個鐘頭45分鐘～ 除咗食飽飽之外，仲有一樣嘢好特別，就係出殯之前，主家同土工師傅都一齊食暈浪丸 小編當然係第一個要食啦 以免到時暈船浪，要主家照顧返小編就好尷尬

當日真係先人保佑 兩程嘅船程都唔算大浪。天氣亦算穩定，只係去到東平洲嘅時候，落咗好少微微雨，跟住做完成個儀式，主家換晒衫上到船先開始落大雨～

返到市區，我哋仲去埋主家屋企旺屋，做完成個儀式已經係下午三點幾… 小編返埋公司再返屋企，已經係夜晚六點幾…返到屋企即刻大昏迷到第二日

小編擔心左兩個星期既個案最終順利完成 要多謝整個團隊嘅幫忙～ 感激不盡