2023年11月25日

尋日晴善舍完成咗一對BB的個案。 小編估計孖胎的個案真係唔係好常有，因為就算當日醫院出嘅文件都有少少錯誤… 原因係醫院都話佢哋未做過 

呢一對BB已經三十幾週，尋日小編見到嘅時候，真係好似兩位小天使瞓得好冧咁，好可愛的。

爸爸媽媽準備咗一啲好靚嘅衫仔比BB。好彩我哋兩位土工師傅都係爸爸，佢哋兩位都好細心幫BB們著衫。由和尚袍，衫仔，包被逐件逐件好小心咁幫BB們穿上…小編真心感謝佢哋嘅細心。

在火葬場家人最傷心嗰一刻，就係撳掣嗰一下。撳一次已經好難受，尋日家人就要撳兩次。先送姐姐到火葬區，跟住到妹妹。要承受呢種傷痛兩次，絕對係唔容易…

小編希望媽媽要保重身體

而兩位小天使都要保佑爸爸媽媽喔