2026年3月7日 Rose Hand Cream

晴善舍喺2026年能夠有新方向新project

其實係因為呢一支人手製作hand cream

話說有一次喺朋友度做完肌肉嘅按摩治療

呢位朋友送咗支玫瑰hand cream仔俾小編

上到巴士 諗住搽吓hand cream啦

一搽 就覺得hand cream啲味好舒服

令到個人放鬆咗

利申： 本身小編係麻麻哋玫瑰味

但係突然間真係覺得好舒服

真係好想將呢個放鬆嘅感覺同大家分享

小編個豬腦靈光一閃

如果客人同小編傾完喪禮安排之後

可以送呢支hand cream俾客人

客人用呢支hand cream嘅時候心情可以放鬆一下

咁都幾好喎

所以小編就請我呢位朋友幫晴善舍

人手製作一批玫瑰hand cream

當見完一個家庭

就會送一支hand cream俾佢哋

希望客人可以有一刻 暫時忘記繁瑣憂傷嘅心情

儘管係好短暫嘅時間

都希望客人讓自己停一停落嚟

感受當下

而呢個想令人放鬆

「享受當下 感受生活」嘅理念

亦造就咗今年嘅大project

「Me Time Garden」嘅誕生

呢支對小編有神奇啟發嘅hand cream

都希望幫到大家

如大家想訂購玫瑰hand cream都可以㗎

全部收益都會直接撥入 晴善舍嘅助人基金

有興趣可以PM小編喔

2026年3月4日 Me Time Garden

晴善舍2026年既新Project

晴善舍係一個 #慈善機構

「殯儀社企」 係過往九年幾唯一既業務

2026年 我哋將會有第二個業務方向

今日為大家正式介紹

 晴善舍 Me Time Garden

好多人因為工作家庭生活嘅壓力

或者社會上好多唔開心嘅新聞

變得緊張 煩躁 不安

或者好似晴善舍嘅客人 經歷失去至親

會有憂心憂傷嘅時間

為左可以延續我哋對社會嘅服務

小編就決定開啟另一個業務方向

「Me Time Garden 」會有不同嘅工作坊

比大家可以放鬆身心

Relief • Relax • Recharge

係Me Time Garden 想同大家分享嘅理念

同晴善舍殯儀社企一樣

收入嘅一部份會作為慈善用途

而Me Time Garden的收入 扣除成本後

會撥入晴善舍小天使基金

小編稍後亦再會為大家介紹

今年晴善舍對於 #小天使 #失胎 嘅新計劃

希望再幫助到更多 #失胎父母 

所以每一位嚟到Me Time Garden學習嘅朋友

同時間都係做緊善事㗎

賣少少廣告先

我哋第一個會開嘅工作坊

就係關於「八字命局入邊嘅五行 」加 「芳療精油按摩」

其實八字都會睇到你身體邊度會弱啲㗎

再用針對唔同「五行」嘅精油

教你去按摩相應嘅部位

相得益彰

如果有興趣嘅朋友

就繼續留意我哋晴善舍嘅update喇

20260224 感謝各位善長！！！

好多謝各位

知道都會有人問 點解冇錢做殯儀服務

唔搵啲大機構喔…

如果小編冇搵錯 大機構都有啲免費嘅殯儀服務

但係一系列嘅程序 對於一個啱啱失去至親嘅家庭嚟講

可能真係太繁瑣了

小編剛剛都回應咗之前眾籌post嘅其中一個留言

唔好意思 小編留咗一段好長嘅長長長文

可能未必個個都啱聽

但係可以省卻咗一啲非常繁瑣嘅程 去幫有需要嘅人

呢個都係小編嘅初衷

咁會唔會好容易俾人呃？

其實過往咁多年大部份嘅求助個案都係轉介嘅

有院牧 社工 朋友

老實講 都係一個「信」字

轉介之後 就唔會有任何審查

喺呢九年裡面 小編做完咗每一個求助個案

都覺得呢啲個案係值得幫助嘅

by the way 小編都好想再講

其實晴善舍都係一個慈善機構嚟㗎

希望真係可以幫到有需要嘅家庭