2025年6月23日 個案分享

感謝客人信任 感謝先人保佑

尋日完成咗一個殯儀館嘅道教喪禮

呢個個案 本身接得好急既

因為喺未傾喪禮安排前

我哋就要安排招魂法事

因為咁啱喺呢個客聯絡小編嘅同時

有一位舊客人話會介紹一個朋友俾小編做喪禮

所以我一直以為呢個家庭係小編舊客人嘅朋友

前日設靈當晚 小編同客人傾偈

發現原來佢哋唔係舊客介紹嘅

原來客人係睇到晴善舍幫助胎兒做殯儀

客人因為職業嘅關係

知道過咗身嘅胎兒如果父母唔處理嘅話

就會變成醫療廢物

認同我哋晴善舍嘅理念

所以當下就決定搵晴善舍幫手

小編真係好感謝客人嘅認同同信任

另外尋日出殯嘅時候

應該都係先人保佑

尋日早上因為要來參與大殮儀式嘅親友都到齊

所以我哋就比原定早5分鐘開始儀式

跟住家屬同小編上齊旅遊巴之後大約3分鐘

即刻風雲變色 落起大雨同刮大風

街邊啲紙紮都吹起晒

真係好好彩我哋早咗5分鐘上車

一入到粉嶺 就變回陽光普照

好感謝先人保佑 一切順利完成