2025年6月11日 傾吓計

每日都好似有一啲唔開心嘅新聞

小編唔係見唔到 而係唔想share…

只希望逝者安息…

不如今日就講啲無聊嘢

小編想同大家分享夢境

唔知大家有冇試過發夢 夢見殯儀館 棺材 同埋遺體

發完夢之後大家又會唔會好驚呢？

小編當然就有發夢見過以上嘅嘢啦

不過發夢內容可能同大家會有啲唔同

幾次發夢見到殯儀館 都係關於做嘢

不過醒返之後 就發覺夢裡面嘅環境其實都幾恐怖

其中一個係小編同堂官先生去到一個L型嘅禮堂

個裝修好似有啲古代嘅感覺

喺夢裡面係一個殯儀館

但係現實係冇呢個地方嘅

裡面有好多着住唐裝衫嘅男人

大部份嘅人都係演奏着樂器

小編知道佢哋係打緊齋

堂官先生同小編講

穿過呢個禮堂去另外嗰邊嘅門口

先去到我哋要做嘢嗰間房

小編勁尷尬 因為穿過好多好多人

仲要當時只係得小編一位係女士

跟住再上第二層 先搵到我要做嘢嗰個禮堂 …

第二個夢好想同大家分享

就係小編去到一個好似相中嘅地方

係夜晚嚟嘅 小編喺街上邊見到一個殯儀館嘅職員

現實中係有呢個職員嘅

小編就問佢 我要去嗰個禮堂係點去？

佢指住嗰幢唐樓 你經嗰條樓梯上去就可以了

小編上到條樓梯 好黑好暗 係得一個黃燈膽咁暗

跟住上到頂有對紅色嘅大木門

小編聽到入面係打緊齋

去到呢度，大家可能會覺得恐怖

其實當時小編都覺得有啲恐怖

但係小編就好緊張同自己講

我開唔到道門呀 點樣開㗎？

開唔到門我點入返去做嘢呀？

啲主家搵唔到我點算呀？

即刻落返落個街度 睇吓有冇第二個門口上去

其實仲有好多好多個夢

通常都係嗰啲內容

夠時間做嘢 但係小編又去唔到要做嘢嘅地方

或者未領遺體 或者啲師傅未到

即係好似發夢要考試喇 但係未溫書一樣

以上就係小編之日常

*圖片來自網絡