2025年5月1日 電影分享

今日小編想同大家分享

睇完「虎毒不」 嘅感受 （長文)

大家一睇呢套電影個名

都應該估到 結局係一個悲劇

雖然大約估到個結局係點

但係都好想入場睇呢套電影

因為作為一位媽媽

其實都好想睇新手媽媽作為題材嘅電影

再激勵自己 為母則強

喺電影裡面 見到好多自己嘅影子

女兒同電影一樣 係一個喊包

喺頭三四個月嘅日子 亦都係我哋最困難嘅時間

而當時女兒出生嘅時間 正值疫情

小編未坐完月 就已經出嚟做嘢

嗰陣時又請唔到工人

好彩當時有個信得過嘅陪月姨姨

直程掉低間屋比陪月姨姨 自己就出去做嘢

最挫折係 女兒比任何人抱都得

小編一抱就喊

只有餵哺母乳嘅時候 女兒先會乖乖地比小編抱

去殯儀館工作 又谷奶

唯有喺廁所 整走啲奶出嚟

呢啲日子 一路睇部電影 全部回憶走返晒出嚟

最深刻嘅一句 係談善言話「我每日只係瞓咗五個鐘」

小編好想講 由陀住女兒 到而家女兒就嚟四歲

其實可以一覺瞓到天光嘅日子 少之又少

可能係呢四年幾裡面得十幾日可以一覺瞓天光

一路睇電影嘅時候時 可能好多觀眾都會覺得

可能有一啲嘢係女主角自己無謂嘅堅持

如果可以放開啲 佢自己唔會咁辛苦

小編睇嘅時候 確實都有少少咁樣諗

但係站在女主角嘅角度

佢最親嘅人

冇一個人係喺思想上行動上認同同支持佢

呢個就係造成電影結局嘅原因

小編睇完呢部電影當然好心痛

但係亦都知道喺現實社會亦都會發生呢啲事情

小編遇見太多同呢個世界無緣嘅小天使

能夠成功出世 真係好幸運

做父母嘅 係要保護小生命

但係保護小生命嘅同時 做父母嘅亦都要好好保護自己

互相支持 照顧小朋友嘅責任唔係只係其中嘅一方

照顧者亦都唔可以逼得自己太緊

盡量要明白有啲決定可能係暫時性嘅

好似小編咁

喺陪月完成兩個月嘅工作之後

當時亦請不到工人姐姐

因為冇人幫手照顧女兒

所以小編在半年多期間就暫停了晴善舍在Google的廣告

除了舊客人的個案 一律不接新客的生意

雖然小編都算係家庭經濟支柱

但係真係為咗照顧BB 唯有要做出暫時性嘅決定

過渡咗暫時既難關 之後再諗

呢個就係當時小編嘅諗法…

做媽媽係好難

做初生BB嘅媽媽更加難

一旦遇到有情緒問題 就真係要尋求專業嘅意見

要記住 陀着BB嘅時候 係幾咁期待見到BB

呢啲美好嘅感覺（好似電影最尾咁）

所有媽媽加油