今日實在係百感交集
話說今日個案嘅先人，其實係小編嘅舊客。
喺兩年半前，呢位客人打俾小編，想用我哋晴善舍服務為佢先生完成喪禮。不過當時小編因為就嚟要生BB，所以由見客到喪禮都係由徒弟完成。
到咗前幾日，呢個家庭又再打俾小編，話媽媽過身了。而媽媽就係當日聯絡小編嘅客人。
今日終於同呢位舊客「見面」。小編仲好記得，呢位客人當日同小編講過啲乜嘢，佢有問我哋社企係點樣運作，而小編解釋咗之後，佢就決定用我哋嘅服務。
由舊客變左「先人」，今次係第二次。第一次嘅經歷都同大家喺度分享過。一個你曾經熟悉見過嘅人，去到最後一程嘅時候都願意信任自己，為佢哋完成喪禮，其實係好感動。
不過今日做緊喪禮嘅時候，小編又發現另外一件事，就係原來呢位舊客，都算係社會既大人物。忽然間覺得，呢位舊客咁有頭有面，最後都將丈夫同自己嘅喪禮交託俾我哋晴善舍，真係好感謝佢哋嘅支持同信任。
喺呢度希望呢位舊客人可以在另外一個國度同丈夫重聚。亦祝願佢哋家人身體健康，生活愉快。
Commenti