2023年6月21日

最近晴善舍完成咗幾個小天使個案

不約而同都係出左世唔夠一日就過身既BB

有的亦需要解剖。再次感受到生命既無常。

其中一個個案比較深刻。

通常小天使個案，出席喪禮的都只有父母，有時都有長輩。但係如果BB本身係有哥哥或者姐姐，通常父母都唔會帶佢哋過來。但係最近有一個案，父母就帶埋BB嘅家姐嚟喪禮。當日在醫院禮堂，喪禮並冇宗教儀式。只係父母，長輩同埋家姐過來。我地將BB入殮後將小棺木放在小禮堂的枱上，爸爸就抱咗家姐坐上枱上面小棺木旁邊，比家姐陪住BB走最後一程。家姐同BB傾左好耐計，又織咗條手繩俾BB～

家姐年紀大約五六歲，可能大部份人覺得，未必想呢個年紀嘅小朋友到喪禮，或者唔想小朋友見到遺體。但係呢個個案既父母，係願意比家姐知道BB既情況同好好咁同BB道別。小編覺得父母好難得。雖然家姐年紀仲好細，但係小編會覺得家姐長大咗之後都會記得自己有個妹妹，都會記得自己見過呢個妹妹同埋同佢講再見。呢個係一個好寶貴嘅經驗。

其實願意比小朋友去認識同面對死亡，係需要好大嘅勇氣。