2023年12月18日

前幾日小編又去左 #青松侯寶垣長者鄰舍中心 做講座。上次就是殯儀講座，而今次就係做生死教育講座。

對於小編嚟講今次講座嘅經驗有少少特別。有一位女士，喺我哋未開始講座嘅時候，就拎住部手機show咗張相俾小編睇，相中係一對佢特登訂做嘅鞋。跟住又俾埋一套旗袍我睇，佢話上次聽完小編嘅殯儀講座之後，就即刻搵返套靚衫，跟住趕喺呢個講座之前去做左對鞋，諗住俾小編睇，呢套衫就係佢日後走最後一程嗰套「壽衣」。

呢位女士話上次聽完小編嘅講座，之後有好認真考慮自己將來走最後一程自己想要啲乜嘢，跟住就話俾佢嘅契仔知。呢位女士都話，最後係佢契仔講咗一句「 唔好講呢啲嘢啦」 反而老人家就毫不忌諱咁講出佢自己想要嘅嘢～ 

小編其實真係好開心，因為真係有老友記聽完講座之後，心動加行動，打破傳統嘅忌諱，為自己將來嘅喪禮作準備，認識死亡面對死亡，其實真係一件好正常嘅事情。連老人家都唔忌諱，點解我哋做後生嘅又唔肯面對呢？