2023年10月31日

做任何生意有熟客係件開心嘅事，但係我哋殯儀呢一行，每次見到啲舊客，其實心情都好無奈…因為代表佢地家庭又有親人過身…

前幾日同一個舊嘅客人做咗一個院出服務。呢個客人已經係第三次「幫襯」小編，上兩次係佢既兩位哥哥，今次亦都係佢嘅哥哥… 同過往兩次一樣，呢位客人都係自己一個來完成喪禮。

今次完咗火葬禮後上到靈車送客人到車站，客人突然間鬆一口氣… 同小編講，七年喇，佢總共照顧咗呢三個哥哥一共七年…

其實呢位客人都已經70幾歲，在於別人嚟講，佢都係一個老人家，要一位老人家同一時間照顧三位有病嘅哥哥，其實真係好吃力… 係真嘅，失去至親會好傷心，但係對於照顧者黎講，某程度上被照顧者離開咗都會有種如釋重負嘅感覺… 心情係好矛盾嘅。

不過小編已經了解晒呢位客人嘅家庭背景，正常嚟講，短期內，佢都應該唔需要小編嘅殯儀服務因為佢嘅哥哥們已經離開晒 … 而家小編係真心希望呢位客人同佢嘅家人身體健康，唔想咁快再做呢位客人嘅生意