2022年10月28日

關於近排小編工作的長文

晴善舍喺呢兩個月接咗10個小天使個案 而其中4個就集中在這個禮拜…

小編自從做了媽媽後，對胎兒殯儀服務更加重視。因為小編好明白父母的感受，好明白媽媽同BB二為一體既感覺…

未做媽媽前，處理胎兒遺體同擺好陪葬BB衣物工作都會交由土工師傅處理。但係做左媽媽後，就算胎兒既狀況係比較差，小編都忍唔住要親手同佢地包好被仔，放好父母為BB準備陪葬物品。呢個係小編從來都冇諗過自己會有咁嘅改變。

好多時候，胎兒因為種種問題需要解剖，好似過往做過幾個個案，因為要解剖同過死因庭嘅關係，往往胎兒出咗嚟要等一段好長嘅時間先可以做喪禮。到喪禮當天胎兒嘅狀況其實會變得好差，有時連父母都唔想睇，或者好多時候爸爸都建議媽媽唔睇。其實去到呢啲情況小編都好傷心，好似搞到父母唔想睇BB最後一面咁，但係比媽媽睇咗，媽媽會更加傷心，好兩難。所以當每次小編為BB包好被仔，小編都會同BB講「而家姨姨幫你冚被被先，唔好凍親，一陣爸爸媽媽就會抱你架喇」（我哋一般會安排爸爸媽媽在車上抱住棺木到永愛園或者火葬場）

尋日小編睇到另外一個行家嘅Facebook讚揚仁安醫院婦產科姑娘，其實小編亦不約而同想講講仁安醫院嘅服務。晴善舍接過幾次在仁安嘅胎兒個案，最近一次是上個月。每一次仁安婦產科姑娘的服務都好好，佢哋係少數會幫手將胎兒包好放入盒子嘅醫院。當日媽媽唔想睇BB，就交由小編代為處理。小編睇到BB後，忍唔住同姑娘講「真係好感謝你哋，你哋真係做得好好！」當日個案嘅胎兒係十幾週，好細，係未成型，但係姑娘將BB包得相當好，當下小編係真心感謝呢位姑娘。

反之，有啲大家覺得好高級而又收得好貴嘅私家醫院，對胎兒遺體嘅處理方法，小編真係不敢恭維…