2022年1月21日

每次遇上胎兒個案，小編都會感到好心痛。但今次的個案係咁多個個案裡面，最痛心既一個。

月初一位爸爸聯絡晴善舍，得知佢29週的胎兒過身。喺小編同呢位爸爸溝通當中，知道BB係攞form 11。Form 11俗稱「醫官紙」，即係由法醫官簽署既死亡文件。小編當時覺得好奇怪，點解一個胎兒喺醫院過身會攞form 11。（因為大部份出form 11都係政府嘅公眾殮房，當然醫院都會出，不過係少數個案）

當小編見到呢位爸爸之後，知道原來BB喺29週嘅時候，媽媽去做產檢，突然發現BB心跳慢，要緊急入醫院生產。BB出世之後即刻入NICU，最後搶救唔成功，BB離開咗呢個世界。

但係點解BB係攞form 11呢，因為醫院需要解剖去了解BB過身嘅原因。

係，冇聽錯。一個29週，基本上佢仲係一個胎兒，要解剖…

（小編一路都喺度諗點解BB離開左仲要咁樣捱一刀）

前兩日喺喪禮上見到BB，因為解剖過而身體出現咗啲變化… 爸爸都唔忍心俾媽媽見BB最後一面… 見到爸爸睇到BB嘅反應…小編今次個心係碎咗。BB身體出現咗變化我哋亦都同唔到佢換爸爸準備既衫仔…成個情景…好無奈… …

願BB安息…小編知道你爸爸媽媽真係好愛你…