2020年7月29日

小編的貓貓阿菜在7月21日畢業了

首先要感謝為菜菜集氣過既各位。由第一次菜菜病發到過身嗰日，佢好叻豬，支撐到10日。而係呢10日裏面，菜菜其實係有正常食嘢飲水去廁所。小編媽話菜菜過身嗰朝早，其實佢係有食嘢同飲水。跟住就突然間氣喘，慢慢慢慢就走了。 7月27日，係菜菜火葬的日子。嗰日小編爸，小編夫同小編友，一齊送別菜菜。小編友係小編大學時的室友，見證着小編領養菜菜回家，亦和菜菜生活過。希望邀請到最愛錫菜菜嘅人，陪佢走最後一程。 當日我哋去到寵物殯儀公司，一見到菜菜，小編就忍唔住喊到豬頭咁。 其實之前有好多人都訪問過小編，當我哋做殯儀嘅面對着熟悉的人過身，究竟我哋會唔會睇化左。我每次都會答：一定唔會。工作還工作，今次面對菜菜嘅死亡，小編就好似平時工作上見到嘅家屬咁，一樣都係好傷心同埋有無限嘅唔捨得。 不過小編已經釋懷，知道每位毛孩都有佢哋各自嘅任務。菜菜畢業了，自由了，希望佢在彩虹橋幸福快樂。 菜，好感謝你喺呢15年半陪伴住小編，多謝！