2020年7月12日

佢叫阿菜（其實佢叫白菜），今年18歲，係小編既貓貓。2004年12月6號小編喺加拿大Waterloo一間petshop領養的。2006年小編回港既時候，阿菜都一齊搭飛機返黎。轉眼間15年半，阿菜都係阿菜，小編就由大學生變左個C9

尋晚，小編媽突然WhatsApp阿菜一段video，阿菜呼吸好急速，又留口水，小編即刻飛的返阿媽屋企。（點解阿菜唔係同小編住？最主要因為佢真係太老唔想佢轉新環境，同埋小編媽家中有其他貓好依賴阿菜）

返到媽媽屋企，見到阿菜訓喺地上，口張開左，呼吸勁急，雙眼已無神。小編即刻抱返佢上梳化，但係就算佢幾辛苦都好，佢都要訓喺地下... 當時阿菜好虛弱... 小編忍唔住喊，同家人講如果就咁送佢去醫院，佢就再返唔到屋企... 所以決定比阿菜留喺屋企休息。

小編真係忍唔到，係咁喊，同左阿菜講左好多野。多謝佢，同佢講阿菜係叻叻豬... 過左一段時間，阿菜好似精神返...仲肯食返少少野。

阿菜係一隻好硬頸好固執既貓，家人同小編講，阿菜見到小編一路喊，佢都有喊，生存意志好強。不過其實大家都好明白，好運同奇蹟可能只得一次...

小編已經有心裡準備...不過都希望大家可以集氣，願阿菜平安......