2020年5月11日

昨日係母親節，我地處理左兩個個案。其中一個個案，是一個舊客的。客人係一位五十多歲女士，昨日是她丈夫的喪禮。喪禮在醫院舉行，只有太太及逝者的一位好朋友。其實這位太太有一個兒子，有孫，太太在國內亦有親人。不過因為疫情關係，國內嘅親人嚟唔到香港。昨日太太好傷心，佢覺得場面好冷。另外一個令太太喊得好犀利原因，係因為其實兩個月前，太太嘅媽媽都過左身。媽媽的喪禮都係我地晴善舍安排的。昨日太太一路喊，小編都冇嘢可以做到。唯一可以做嘅就係企喺太太隔離，手搭着太太的膊頭，陪住佢安慰佢。只係兩個月，小編見到太太失去左佢兩位至親既人。

太太之前都有同小編講佢嘅經歷，為咗要照顧年邁母親，一個人放棄喺國內嘅家庭，嚟咗香港。喺國內剩返丈夫同兒子同埋個孫，成頭家都冇一個女睇住。到丈夫喺國內有病，兒子都照顧唔到丈夫，唯一辦法就係申請埋丈夫落香港。一個女人喺香港打工，同時間要照顧媽媽同埋丈夫。大家聽到太太既經歷，都可以想像到佢其實真係好辛苦。

小編希望太太可以堅強，之前要照顧親人雖然係辛苦，但係有家人喺身邊，其實會令我哋嘅心變得更強大。而家人離開了，我哋會因為冇咗依靠而容易變得脆弱。昨日係母親節，這位太太好肯定唔單只係一位好母親，仲係一位好女兒同埋好太太。加油。